張志德 ：莫天才神經刀隨時燒蘇

估唔到莫耶斯去到西甲都可以創造驚喜，上仗率領皇家蘇斯達爆冷擊敗巴塞，但「莫天才」始終太過神經刀，上季執教曼聯亦試過喺車仔、阿仙奴身上搶到分，歐聯打和拜仁慕尼黑，但卻輸畀史篤城、新特蘭等弱隊。因此，切勿因為蘇斯達贏咗巴塞，而對佢哋抱有太大期望。今晚西班牙盃十六強首回合，皇家蘇斯達作客維拉利爾隨時打回原形，細鬼寧願揀「黃色潛艇」主勝。

（周四凌晨3時開賽）

皇蘇上仗西甲擊敗巴塞，一來因為「地上最強」教練安歷基輕敵，正選陣容收起美斯、尼馬。二來莫耶斯該仗一心「死守突擊」，畀佢搵到一次機會入波，呢種情況好難再發生。事實上，比賽係逐場計，更何況聯賽同盃賽性質唔同，而且莫耶斯對付巴塞同維拉利爾嘅戰術亦應該唔同，最起碼唔會再一味死守，間接增加維拉利爾入波機會。

維拉利爾托弗勝望濃
維拉利爾愈踢愈順，連盃賽在內，近十仗獲得八勝兩和，包括上月聯賽大炒皇家蘇斯達4比0，亦係莫耶斯執教皇蘇以來唯一敗仗，「黃色潛艇」心理上肯定佔上風。兩回合賽事，維拉利爾今晚必然把握地利盡力爭勝，否則次回合作客會比較難踢，維拉利爾戰勝意一籌，可以秤先。