卡爾萬：尼馬哨牙蘇孭飛夠照 巴塞鍊盡-2冇有怕

安歷基Order盡炒保飯碗
西班牙盃16強首回合壓軸戲碼，巴塞會喺魯營球場恭候艾爾切，「地上最強」最近負面消息一籮籮，更盛傳主帥安歷基接到球會最後通牒，喺未來兩場要贏得好好睇睇，如果唔係就聽執包袱！相信安帥為咗保住飯碗，今場對住專注聯賽護級嘅艾爾切，肯定落柯打盡炒，-2照捧「讓球主勝」！

（now632台及TVB13周五清晨5:00直播）

巴塞踏入新一年後麻煩多多，體育總監蘇比沙列特落鑊被炒，跟住到做佢助手嘅佩奧爾請辭，而巴塞名宿史岱捷哥夫亦忍唔住連珠炮發，揭示球會存在唔少問題。但講到最大劑嘅，肯定係王牌美斯同教練安歷基盛傳擘面，美斯仲被傳媒質疑以急性腸胃炎為由，拒絕參與巴塞公開操練，藉此向安帥作無聲抗議，今場隨時扭計唔落場。

專注聯賽護級 艾爾切話明唔搏
無論美斯患病孰真孰假，今場最終落唔落場都好，巴塞魯營威力始終非同小可，今季對住科爾多瓦同CF格蘭納達兩支下游隊伍，夾埋狂轟11球兼且冇失波，喺聯賽首循環面對今場對手艾爾切，亦都輕鬆大派3隻光蛋，正所謂殺雞焉用牛刀，今場就算冇咗美斯孭飛，前線靠尼馬同蘇亞雷斯都已經夠晒照。

再講家陣喺西甲包艇嘅艾爾切，上輪聯賽逼和維拉利爾結束4連敗頹勢之後，教練艾斯基巴賽後揚言希望呢場能夠成為佢哋嘅轉捩點，嚟緊可以全力搶分護級，相比起今場西盃造訪魯營，佢更在意下輪鬥畢爾包嘅聯賽。艾爾切原本已經差巴塞幾班，如今教頭仲講到明專注聯賽，今場好難唔做巴塞炮灰囉！

Data King：巴塞主場旺角球細
?巴塞近5仗主場開出4次「角球細」。

?巴塞今季13戰主場狂轟50球，平均每場入3.8球。

?艾爾切今季5場作客敗仗都「由頭輸到尾」。

乜都玩錦囊：半場分勝負熱捧主勝
巴塞每逢喺魯營出戰例牌搶韁，今季12場勝仗有9場開出「半主」，撞啱艾爾切今季作客輸親都由頭輸到尾，既然雙方都咁鍾意半場「分勝負」，咪諗咁多，一於熱食1.33倍「半場主勝」！

盤路解碼
巴塞今季主場試過7次讓兩球，有5次開出「讓球主勝」。